نفسى اروح السينما لوحدى
نفسى اتمشى على الكورنيش الصبح بدرى
نفسى اروح اسكندرية فى الشتاء
نفسى اشرب شاى بالنعناع على قهوة فى وسط البلد
نفسى اسمع فيروز
نفسى اغنى بننجرح بتاعة منير على مسرح الاوبرا
نفسى انزل البحر
نفسى اكل كشرى
نفسى فى حفلة كبيرة لمنير وفيروز ان شاء الله يلغوا الاغانى بعد كدة
نفسى اروح لدكتور سنان بس خايف
نفسى الاقى حد يسمعنى من غير ما يرد عليا
نفسى اقعد على النيل من غير كازينو
هذا عن نفسى
واما عن ما حولى
نفسى يوتوبيا تبئة اجمل مجلة
نفسى مصطفى يتجوز
نفسى محمد يبئة دكتور
نفسى كريم يبئة مهندس
نفسى نور تكبر وتقول بتعيط ليه
نفسى المشروع يخلص
نفسى البلد تتغير
نفسى قانون الطوارى يتلغى
نفسى يتخلصوا من الحرس القديم والجديد وما يبئاش فى حرس اساسا
نفسى الزحمة تخف شوية
نفسى الحاجة تبطل تغلى
نفسى نوصل كاس العالم
نفسى فى جناين وشجر وورد
نفسى فى بحر من غير رسوم دخول
نفسى مصر تبئة مصر
ونفسى بكرة يبئة احلى
نفسى المركب تتعدل بئة - خلاص زهقنا

مصر تعبت خلاص

مصر يامه يا بهيه يام طرحه و جلابيه الزمن شاب وانتي شابه هو رايح و انتي جايه جايه فوق الصعب ماشيه فات عليكي ليل و ميه و احتمالك هو ّ هو ّ و ابتسامتك هيّ هيّ تضحكي للصبح يصبح بعد ليله و مغربيه تطلع الشمس تلاقيكي معجبانيه و صبيه يا بهيه

هى دى مصر

مش هية دى مصر

99 %

الناس دى هابلة ؟
عاوزين يقنعونا ان الراجل ده فى السن ده
وبعد ما طلع .... اهله
راح وقال
نعم

عم حبيبى

المكان : شارع فى مصر
التاريخ : من حوالى 16 سنة
اليوم : يوم من ايام ربنا
الساعة 7.30 صباحا
انا
يا عم حبيبى : هات شوية فول
خد يا حبيبى
ما تنساش الطحينة زيادة
حاضر يا حبيبى
والسلطة مية كتير
حاضر يا حبيبى
والنبى العيش سخن
حاضر يا حبيبى
انت ياد بطل زق - ده راجل كبير كل يوم بزقه علشان هو طويل وبياخد دورى وبتاخر ع المدرسة
يا عم هو انا زقيتك ولا جيت جمبك
والنبى يا عم حبيبى هات ورقة جرنان
وامشى بسرعة
والزيت بيدلدق - على اول عربية - وورا العربية وع الرصيف
افرش جرنان - واقعد ع الشنطة - وافطر الفول بتاعى
ومن بين العربيات
اتفرج على البنات - لابسين كحلى وابيض وبيضحكوا وصوتهم عالى
مش حلوين - بس حلوين اوى
واكل الفول واشرب مية السلطة وامسح ايديا بورقة من نص الكراسة
وارجع الاطباق واستنى الباقى ومعايا شلن من مصروف امبارح
ومعايا كتب كتير وقميص كان ابيض وبنطلون كان بنطلون
واستنى كتير عشان اعدى الشارع
وقبل ما اعدى ابص ورايا والاقى عم حبيبى بيشاور
واقوله سلام يا عم حبيبى
يقولى سلام يا حبيبى
والاقى الراجل الى زقنى - الفول اتدلق على بنطلونه
اضحك
واجرى بين العربيات وانا بعدى الشارع
والاقى الباب اتفل
وانط من فوق السور عشان ادخل المدرسة
الاقى حسنى بتاع الالعاب ويقول اركن يا خفيف جنب زمايلك
والواد حجاج بيشتم عم حبيبى عشان هو الى اخره
طب يعنى عم حبيبى هيعمل ايه ولا ايه
ما البلد كلها عاوزة تفطر فول
وحسنى يقولك اول حصة للمتاخرين ينضفوا الحوش
والى بيتكتب غياب اول حصة بيبئة غياب اليوم كله
لا يا عم - انا ارجع زى ما جيت
بس ازاى ؟
اجرى بسرعة من وراء الكانتين - ونستخبة فةى الحمام ونتحمل الريحة المقرفة
وبعد الطابور ما يخلص
زى ما دخلنا - زى ما خرجنا
وغياب غياب - يبئة غياب بجد بئة
ونسمع صوت العيال بتنده من الشباك واحنا ماشيين على الكوبرى ورايحيين اى حتة بس
يا بختك يا ابن الكلب انت وهو !! انتو مزوغين ؟
لا يا حبيبى مش مزوغين احنا غـــــــــــــــــيـــــــــــــــــــــــــــــاب النهاردة
:)

مش مهم

مش مهم لو هتعرف

مش مهم ان انت تعرف

المهم ان قلبى من جوة عارف

مش مهم

عارف انت ان انت كل حاجة ؟

عارف انت ان انت احلى حاجة ؟

عارف انت ان انت عمرى كله ؟

عارف انت ان انت نور عنيا ؟

مش مهم

انت عارف او مش عارف

المهم انت تفضل انت

المهم انت تضحك

مش مهم انىً ابكى

مش مهم انىً احزن

المهم انت تفرح

المهم انت تحلم

مش مهم عندى احلم

مش مهم عندى بكرة

المهم ان انت- تفضل انت

اصل انت هو بكرة

يبئة بكرة بتاعك انت

بكرة عندى مش هيجى

اصل انت خلاص هتمشى

ولما تمشى

وابئة وحدى

هفضل اقول

يا رب بكرة – بتاعك انت – يبئة احلى .

مجرد سؤال

هو انا غلطان انى ما اشتركتش فى المظاهرة الى عملوها علشان تامر حسنى خد براءة ؟

اوعى تخاف تقول - جمد قلبك واتكلم

مرة واحد حب واحدة وفضل يحبها يحبها يحبها يحبها
وفى الاخر طلع - مفيش حب - اى حاجة تانية بس مش حب
علشان هو كان بيحبها وهى ما تعرفش
بس مفيش فرق
لو عرفت ايه الى هيحصل ؟
ولا حاجة
ممكن تكون هى كمان بتحبه وما قالتلوش ان هى بتحبه وخايفة يكون هو ما بيحبهاش
لو قالها اكيد هيقولها متاخر
ولو قالت له اكيد هيكون هو نسيها
ولو فضلوا كدة
هيفضلوا عايشين على حلم ان همة يتقابلوا
ولو فضلوا يحلموا
مفيش حاجة هتتحقق
علشان ده حلم وبس
لو بتحبها
او حبتها
او هتحبها
او بتفكر فيها
او نفسك حتى تلمسايديها
ارجوك قولها قبل ما تلاقى حد غيرك ماسك ايديها

الواد عكاشة ده جميل اوى

عكاشة جميل فعلا
هو فيه عيوب كتير واحنا مش بنتقابل كل يوم ولا بنخرج كل يوم بس انا بحبه اوى
مش عارف ليه ؟
مش معنى كدة ان انا مش لاقى سبب
لا فى اسباب طبعا
بس انا بئة حتى لو فى اسباب انا بحبه كدة من غير اسباب
باقى الناس الى فى الصورة ليهم قصة تانية خالص هبئة احكيهلكوا بعدين
اصل دول بئة الــــبــا كــــدج
( Package )

اجرى بسرعة علشان تلحق توصل متاخر

كلنا بنجرى ونتسابق ونحارب وكل ده علشان فى الاخر مفيش حد هياخد اكتر من الى مكتوب له
ومفيش حد هيوصل قبل ميعاده حتى لو مشيت 150
برضو عمرك ما هتوصل بدرى ابدا
عارف ليه ؟
علشان ميعادك متحدد من زمان يا ريت كلنا نفهم كدة وانا اول واحد نفسى افهم كدة
بس هتعمل ايه ؟
اصل الانسان اصله

طاقة نور = امل فى بكرة

حد عاوز يجى معايا ونخرج من هنا علشان انا تعبت من الضلمة وعاوز اخرج للنور

حد هيجى معايا ولا اخرج لوحدى ؟
بسرعة قبل ما النور ينطفى - النور لو انطفى هنستنى سنين علشان تيجى طاقة نور تانية

ابعاد العلاقة بين الولد والبنت - انت مصاحب يا كابتن ؟

اخر مرة حد سالنى السؤال ده من حوالى كدة كتير
وبصراحة ما ردتيش علي مش عارف ليه
يمكن علشان السؤال قرفنى
مصاحب
ومفركش
وهبل
اى هبل واى حاجة بنضحك بيها على نفسنا
يظهر فجاة واحد يقولك
لا
اوعى تقول مصاحب
قول مرتبط
يا اخى روح اتوكس
قال يعنى هى كدة هتفرق
مصاحب - مرتبط - ان شاء الله حتى ماشيين مع بعض
كله واحد
اهم حاجة
رنات - ميسد كول - SMS - كلمنى طمنى عليك
رنيلى قبل ما تنامى
رن لى وانت نايم
لا
ابعتلى ميسدج وانت فى الحمام
لا
انت لابسة كدة ليه
لا
انت بتكلم البنت دى ليه ؟
لا
الولد ده بيبص لك كدة ليه ؟
همة زمان كانوا بيعملوا ايه من غير موبايل وشات وكدة
كانت الحياة ازاى
انا بصراحة شايفها احلى
ليه بئة احلى ؟
مفيش لا ترن لى ولا ارن لك
ولا ابعتلى خمسة جنيه علشان اعرف ارن لك واطمنك عليا
واساسا الفكرة غلط
لا
الطريقة غلط
احنا بطبيعتنا بنحب نسيطر على الانسان الى بنرتبط بيه
يعنى مثلا ما تلبسيش - ما تخرجيش
وانت ما تتاخرش علشان تكلمنى
همة اصحابك اهم منى عندك
وبعدين تلاقى ناس بتعند وخلاص
اى عند على اى حاجة
بلاش تكلمى فلانة
ليه ؟
وهى مالها ؟
عملت لك ايه ؟
وممكن تكون فلانة دى رقاصة مثلا
بس اى عند وخلاص
انا بصراحة شايف ان ماجدة الرومى عندها حق
اعتزلت الغرام
وكبرت دماغها
بلا مصاحبة
بلا ارتباط
بلا فقع .......

سلملى على الالتزام

عجيب اوى حالنا
مفيش حد فينا عنده القدرة ان هو يكون ملتزم - ملتزم باى حاجة
يعنى مثلا اركن على جنب يا عم
يقولك ما انا ركنت على جنب
لازم يحسسك ان هو عملك خدمة او عملك معروف مع ان ده الطبيعى - مش الطبيعى ان هو يقف فى وسط الشارع
بس عموما الحياة عندنا فى مصر عديمة الالتزام
انا مثلا
بطلت اروح الشغل فى ميعادى
مش عارف ليه
ومش لاقى سبب
ومش هدور على سبب
وعلى فكرة ببئة صاحى وبرضو مش بروح فى ميعادى
وهية كدة
اشمعنا انا لما بطلب من حد يلتزم - بيقول لا
طب لا بئة
مش هلتزم
ومش هاجى فى ميعادى
انا كمان حر
مش احنا عندنا حرية
انا كمان حر بئة
برة المنحرف بيقول انا منحرف
معترف بكدة
لكن احنا
لا
كل حاجة
اصل مش عارف ايه
اصل حصل ايه
اصل معدتى وجعانى
اصل الطريق زحمة
اى كلام واى فسه - ريحة وحشة يعنى
على راى هانى
احنا ادمنا خمسين سنة ونبئة حمير
عموما لو كل واحد التزم باى حاجة
اى حاجة
يا اخى التزم ان انت تبئة ندل
بس التزم بحاجة مرة واحدة فى حياتك وهتلاقى الحياة بئة لونها فوشيا
وسلملى على
The Egyptian principles

واشمعنى انا الى مش هيجيلى اكتئاب ؟

اكيد انا مش بدورعلى اجابة
علشان الاجابة معروفة
مفيش حاجة اسمها اشمعنى
كله لازم يجيله اكتئاب
وكله لازم يمر بنفس الحالة
علشان هيا حالة
اوعى تفكر فى الاسباب
اصل الاسباب - اسباب
ونتيجة - وخديجة كمان لو عاوز
مش مهم علشان لو مهم ما كنش ده بئة الحال
احسن لك ابكى واشكى بس اوعى تحكى
اصل هتحكى
وكل ما تحكى
ما فى حد هيسمع
علشان كله
عنده
اكتئاب